Molo di jabu ruma Batak, marbagian-bagian do goar ni inganan, jabu bona, jabu soding, jabu suhat dohot sitampar piring. Jabu bona do ummangat sian natolu on. Humaliang bagas i do inganan parpeak ni na opat on, ditonga-tonga ma tataring jala ima nidokna talaga. I do umbahen didok hudon panjaean, talaga olat-olat. Ianggo angka jabu si nuaeng on ndang tardok be manggoari songon na opat di jabu Ruma i, sae ma holan dua pandohan talaga dohot halangulu.
Sai dipodai natuatua do anakhonna asa suman parhundulna, lapatanna; diboto horongna na patut hundul di halangulu manang ditalaga. Ndada holan manjamoti asa unang jurgang parhundulna. Tarpinsang do halak molo so diboto inganan parhundulna, jala molo sai olo marsoluk tu halangulu, lumobi molo jurgang muse parhundulna.
Angka Raja, natua-tua, natunggane, haha, hulahula do na patut pajoloon hundul di halangulu. Ia di talaga, ima horong ni naposo, boru, anak dohot angka nahombar tusi. Dipodahon natuatua do asahundul dihalangulu na patut tu halangulu, hundul ma ditalaga napatut tu talaga.
Sai marpangaradean do halak Batak di haroro ni Raja nasangap mengebati bagasna. I do umbahen sai adong lage tiar natalup hundulan ni Raja, alana ndang patumangon Raja hundul di rere. Sipasangapon do Raja, tomuon sian harbangan, iringhonon di alaman, tateaon tu jabu, paojahon hundul di atas ni lage tiar.
Tartiha do nampuna jabu molo dung bongot Raja tu bagsana, alai rundut dibagasan, tondan Raja ndang juguk ala leleng didiori lagena huhut dipatiur narundutna. Ima nanidokna jolma na so marpangaradean dohot na so marpanghirimon. Ndang ditagam jala dang dihirim na laho ro raja nasangap mangebati bagasna. Jambulan ni tunggane boru gae-giu do songon jambulan ni parsigira, pemput so martontu. Ama i pe gumuntarguntar songon na tubuan posoposo, tarlonggam ma na sajabu i dibahen hasangapon ni raja naro i.
Tung beha pe rundut ni pangalaho ni halak na niebatan ni Raja Nasangap, ndang mipo sahala sian ibana, alai na so marpangaradean i do na tartiha di ulaonna dohot pangalahona.
Molo dung hundul Raja di halangulu, somalna ndang piga halak barani hundul di lambungna. Sai matua didompakhon do i huhut managam angka hata poda sitangihononna.
Sipata di tohap hatungganeon, adong do na talup hundul di halangulu rap dohot natuatua napinaraja, alai disuhat ginjangna dililit bolonna, ndang manigor hojor ibana manahopi na so rombangna. Ala dung dibereng angka natuatua do naung tama pangalahona tu hatungganeon, ujungna ditogu ma ibana tu halangulu.
Alai adong do halak na so mananda dirina. Horong di talaga do ibana alai sai ditahopi tu halangulu. Dibereng do natuatua hundul ditalaga ala so siat be di halangulu ala ndang hum rohana manolothon dirina tu naponjot. Mangaranap ma angka siboto parruhutan, ujungna ditait ma nateal i tu talaga, dipasangap ma natuatua i tu halangulu. I do nian umbahen sai dipodahon angka natuatua; unang sai ala natinogu iba asa tu halangulu, unang sai ala natinait iba asa tu talaga.
Dohot do natorasna marlea molo tartiha ianakhonna ala ni pangalahona, ima angka na so umboto parhundulna. Lumobi ma i na sai olo marsoluk tu halangulu, na so olo pasangaphon natumua sian dibana, na so umboto pasangap Raja dohot na so umboto ulaonna. Na hurang poda ma i didok, jala natorasna i didokma nabias di sangap, ai dipasombu ianakhonna marbangkohon lenjeng.
Dung lam mipo halak Batak sian ruhut Habatahon, lupa ma nang di ruhut ni tohap harajaon. Godang ma parajahon dirina marhite hamaloon manghatai dohot godang ni artana. Ndang tarida sian pangalahona hapalgeon ni parbinotoan mamboan ibana tu hatungganeon, sian i borhat tu harajaon. Sian parhobasan pe harorona nunga boi tu halangulu. Punggur-punggur nunga dibahen gabe sapa, parroha gurdung nunga dibangkit gabe raja.
Molo di ruhut harajaon ni Batak adong do Patik ni Harajaon jala adong do ugari ni Raja. I do ditonggohon na gabe sihirimon di natorop sian Raja na ojak di nasida; pahothon tona, simemehon poda, pangaramoti di patik, pangihutan di uhum; Pamuro so mantat sior, parmahan so mantat batahi. Na di pudi dipaima, na di jolo dieahi. Pangaluan ni nabibe, pangompasan ni namaliali. Naparungkar-rungkar bona, Raja ni parhuhuasi. Pandimunan ni hosa, pangaluan soro ni ari. Panungkunan di poda, na uja manotari. Ompu raja ni tona, na uja mamodai. Parbue na so marlaok bota, na girgir manghobasi.
Dang haambatan mataniari binsar, molo dung tingkina ro panongosan sahala raja, ndang adong hamaloon dohot hatangkangon na boi mangambati ibana hundul di halangulu.