Ndang na si naujui be ahu, nunga matua pamatang, sipareon hurang tinggil, simalolong lam mangarambon, simanjojak ugot-ugot mardalan, sude ma tahe lam moru.
Hugorahon do nian asa paridion mu ahu, lumobi di na loja pamatanghu mandalani tapian tu rura an, alai boasa ma dohononmu, holan na mangarsahi ahu?. Ingot ma najolo, dang marnaloja ahu paridihon ho, dang hea hu dok mangarsahi, mengkel do ahu. Huabing do ho, huompa tu tapian paridian i.Dun
Dang tarpareso au be paheanhu, sipanganon hu, hudokdo asa urupi au, haru mangihoti sipatuku pe nunga lupa a. Alai aha ma alusmu anaha?, Ipe dang tarulahon ho, nimmu. Diingot ho do najolo, sang hea hudok manang aha, las do rhangku mambuat paheanmu, paias bajum, manang mangihoti sipatum.
Boasa muruhanmu ahu molo godang sungkun-sungkunhu tuho?. Dihatuaon on, lam mora-mora do iba lupa, dang niingot nanihatahon nangkinon. Haru pe sala ahu, dung dipaingot ho lobi sian sampulu hali, ingot ma hasian, dinajolo dang hea hudok loja manuhuthon turi-turian, poda marulahulak huhatahon tu ho asa adong bohal mu diparngoluon on.
Dilean ho do nian ugasan namasa saonari, alai molo sai husungkun ho, bohado mamangke HP on, boasa gabe muruk-muruk ho?, didok ho do asa marsiajar au. Ue, dainang…dang marnaloja au mangajar-ajari ho, asa diboto ho manggorethon pitolot mi, huparulahulakkon do songon na mangusa bohonon, boha ma asa boi ho manurat, manggombar. Las ni rohangki dung boi hujaha surat mi.
Molo tung loja au mardalan, alani sahit hon, unang lean di ahu tungkot, alai togu-togu ma ahu. Sai naeng do huappehon tanganhu tu abaram na bidang i, alai ahama didok ho, hasian?. Ue, gabe loja do iba dah, pahundul ma di karosi mi. Ingot ma jolo, anggia,….alai tahe dang diingot ho be i. Andorang marumur ho dua taon, sai hutogu do ho asa boi jojakhononmu simanjojak mi, huabing jala hupajonjong ho mo tinggang, jala hulean do tanganhu bahen sitiopon mu.
Huboto do boha murukmu, molo maraburan sipangangon sian pamangan hi, mangarotahi jabum, loja ho paias paheanhu. Pasabar ma roham, anggi, ingot ma dinajolo, tung maraburan dibaen ho sipanganon i, datung hea humuruhi ho, sai humeme-husulangi ho nanget-nanget hut huajari ho mangan.
Boasa muruk ho, molo husungkun, boasa dang martelepon?. Aha alusmu?, sai maos, ipe martelepon. Ingot ma hasianku, dang marna loja au mangajari ho manghatai, sian sangkababa tu duangkababa, sahat tu namalo ho.
Olo balga soaram molo sai maos marulahulak tinaringotan sada sungkun-sungkun. Nimmu “sai maos-sai maos”, tutu ma i hasian. Ingot ma jo, ai hea do hutingalhon ho molo sai godang sungkun-sungkunmu?. Holan hundul ho di lambungku, nunga sonang au.
Tarsor hupangido sihumisik mi, ahama ma alusmu?. “Tuaha baenonmu i, nga rade dijabu on”, tutu ma nian, alai atik boha lao iba tu jabu ni pamili, dang nangggo adong boan-boan ni tangan?. Ingot ma, anaha, sian na singkola sahat tu na sohot parsingkolaanmu, datung hea husungkun, tu aha hepeng na hutongos i. Dang sonang ahu molo dang hatongos au sihumisk tu haporluanmu.
Ingot ma hasian, dung matua ho muse, ae on mu ma songon na huaeon, jala ingotonmu ma sude hatangkon.
0 komentar:
Posting Komentar