TURI-TURIAN

Pandita Bagudung

Diboto hamu do boasa didok AmanJatikkos Pandita Bagudung?. Tohodo pandita do ibana, pandita ni HKBP, jala martitel Sarjana Theologia. Alai dipartikkian naparpudion, sai Pandita Bagudung do ditanda halak AmanJatikkos on. Aut sura disukkun halak rupani, ise ma pandita muna ninna, molo dialusi, Pandita AmanJatikkos Lumban Gaol, datung piga mamboto. Alai molo Pandita Bagudung?, Oh, na timbo nabolon, bontar-bontar jala todas pamatangna.

Alai molo didok Pandita Bagudung, ba sude do antong mananda sian na baru sorang sahat tu naung saurmatua. Haru Honda molo apala maradi di topi dalan i di tanda halak. Dang holan i, haru manukna pe ditanda. Eh, ai manuk ni Pandita Bagudung do i.

Ra, Sogo do rohamuna ala hudok Pandita Bagudung. Porlu do patorangon tu hamu, boasa ma AmanJatikkos on gabe dijou halak Pandita Bagudung.

Masa ma diluat i ‘hama tikus’ manang bagudung hata batak aslina satua. Molo didok hata ni natua-tua, Tu Sanggar Ma Amporik, tu Lubang ma Satua ninna. Namarlapatan asa saluhut na tinompa i mangingani inganan naung ditontuhon namarhuaso i, unang manegai tu suan-suanan ni jolma. Hape anggo sangombas on, nga tung godang satua on pasudahon eme na masak, naboltok, nang nabibi.

Marsak ma saluhutna pangisi ni hutai. Marragam do dalan dibaen lao mangelele satua, bagudung, tikus on tu lubangna. Sian na di buru, ditimusi, di putas, lan ma na asing sian i dope. Alai, tamba ari, tamba godang do anggo bagudung on di sabai. Lam marsak ma roha ni na saluat i, ai ganup manogot lam bidang do saba i sega, ala naung di harati bagudung.

Dang haru binoto rupani, ise jumolo pasahathon arsak niroha nasida on tu sahalak Pandita na topet adong diluat i. Dungi marhite na patupa partangiangan, diuluhon amanta Pandita on ma ruas i. Dungi lao ma pandita on jumolo tu hauma.

Manogotna i, tompu ma mago sada-sada bagudung on, dang binoto lao manang tudia. Dipaima jolma torop i ma muse sadari, dua ari, tolu ari, sahat tu saminggu, dang adong be bagudung. Littun sude!.

Sian ima gabe didok ma Pandita Bagudung.